क्रिकेटको खेल होस् र त्यसमा कीर्तिमान नबनोस्, यो हुनै सक्दैन्। यस्तै एउटा कीर्तिमान, जुन अहिलेसम्म बनेको थिएन, अस्ट्रेलियाको घरेलु क्रिकेटमा बन्न पुगेको छ। अस्ट्रेलियाका एक खेलाडीले ६ बलमै ६ विकेट लिने अनौठौ कीर्तिमान बनाएका छन्।
अस्ट्रेलियाका २९ वर्षीय एलेड क्यारीले एकै ओभरमा ६ विकेट लिएर राष्ट्रिय मात्र होइन, अन्तर्राष्ट्रिय क्रिकेटलाई चकित तुल्याएका छन्। उनी एक ओभरमा दुई पल्ट हयाट्रिक बनाउने क्रिकेटर पनि बन्न पुगेका छन्।
गत आइतबार भिक्टोरियामा गोल्डेन प्वाइन्ट क्रिकेट क्लबबाट खेल्ने क्रममा उनले इस्ट बालारटविरूद्ध ६ बलमा ६ विकेट लिएका हुन्। उनले ८ ओभरसम्म कुनै विकेट लिएका थिएनन्। तर, ९ ओभरमा विश्व कीर्तिमान बनाउने क्रममा ६ बलमा ६ विकेट लिए।
उनले पहिलो हयाट्रिक तीन ब्याट्सम्यानलाई बोल्ड गर्दै बनाए। उनको उत्कृष्ट बलिङका कारण इस्ट बालारट ४० रनमा खुम्चिएको थियो। उनले पुरै इनिङमा ८ विकेट लिएका थिए।
