इटालियन सिरिया ‘ए’ मा टुरिन क्लब युभेन्ट्सले जितको नयाँ कीर्तिमान बनाएको छ। बोलोग्नविरूद्ध आइतबार सम्पन्न खेलमा ३–० को जित निकालेपछि युभेन्ट्स इटालियन लिगको २६ खेलमा आफ्नो घरमा अपराजित बनेको छ।
अर्जेन्टिनी स्ट्राइकर गोन्जालो हिग्विनको दुई र पाउलो डाबालाको एक गोलको सहयोगले युभेन्ट्सले बोलोग्नमाथि जित दर्ता गराएको थियो। युभेन्ट्स हाल १८ खेलमा ४५ अंकका साथ शीर्ष स्थानमा छ।
१९ खेल खेलेर ४१ अंक बटुलेको रोमा दोस्रो स्थानमा छ। यसै वर्ष नेपोलीबाट युभेन्ट्समा अनुबन्धित भएका हिग्विनको पछिल्लो ६ खेलमा यो सातौं गोल थियो। उनले यस सिजन पुरै प्रतियोगितामा १६ गोल गरिसकेका छन्।
