युवा संघ रुपन्देहीका अध्यक्ष दुर्गा तिवारीमाथि ९ महिनाअघि पनि गोली हानी हत्या गर्ने प्रयास भएको प्रहरीले बताएको छ। केवीआई इट्टा भट्टा संचालक समेत रहेका तिवारी माथि मागेको रकम नदिएपछि गत फागुन ९ गते गोली हान्ने प्रयास भएको थियो।
प्रहरीले सेतोपाटीलाई बताए अनुसार मोटरसाइकलमा आएका २ जनाले गोली हान्दा कारणबस पड्केको थिएन। त्यसपछि प्रहरीले उनीहरुलाई केहि बेरमै पेस्तोलसहित समातेको थियो।
उनीहरुले पोलेका नामका आधारमा प्रहरीले त्यस बेला नवलपरासी सुनवलका ऋषिराम घिमिरे, कास्कीका सन्जोश नेपाली, रुपन्देहीका राजेन्द्र धमेल, उर्गेन गुरुङ, चित्रबहादुर गुरुङ, बेनिराम सोमै र रवि केसीलाई पक्राउ गरेको थियो।
पक्राउ परेकाहरुले शालिकराम चापागाईँ र मनोज पुन मगरको योजनामा तिवारीमाथी गोली हान्ने प्रयास भएको पोल खोलेका थिए। त्यसपछि मोस्ट वान्टेड सूचीमा रहेका चापागाइँलाई महानगरीय अपराध महाशाखाका डिएसपी रमेश थापा नेतृत्वको टोलीले काठमाडौंको सुन्धारा स्थित एक होटलबाट पक्राउ गरी रुपन्देही प्रहरीलाई बुझाएको थियो।
त्यसबेला प्रहरीले पत्रकार सम्मेलन नै गरेर तिवारीमाथि गोली हान्ने मुख्य नाइके चापागाईँ रहेको बताएको थियो। पुनको भने खोजी भइरहेको जनाएको थियो। त्यसबेला तिवारीसँग ३० लाख रुपैयाँ चन्दा माग गरेको र नदिएपछि 'भौतिक कारबाहीमा उत्रिएको’ बयान चापागाइँले प्रहरीसमक्ष दिएका दिए।
चापागाईँ र पुन त्यस क्षेत्रमा हतियार देखाएर चन्दा असुली गर्ने समूहको नाइके भएको प्रहरीले जनाएको छ। बालुवा, ढुंगा, गिटी र काठको तस्कर समेत उनीहरुले गर्ने गर्थे। उनीहरुले स्थानीय व्यवसायी तथा ब्यापारीहरुसँग रकम माग्ने र नदिए अपरहण समेत गर्ने गरेको प्रहरीले जनाएको छ।
चापागाईँ यो भन्दा अघि २०६९ सालमा ८ महिना जेल परेर छुटेका व्यक्ति हुन। भैरहवामा नाइन एमएमको पेस्तोलसहित उनी पक्राउ परेपछि १ लाख धरौटी र ८ महिना जेल परेर उनी छुटेका थिए।
उनी २०६२ सालमा देवदहका गोपी भन्नेलाई गोली हानेर फरार भएका थिए। उनीहरुको समुहले २०७२ साल कात्तिक २२ गते उनले देवदह ७ का नारायण बस्नेतमाथि गोली प्रहार गरेका थिए।
चापागाइँ पक्राउ परेपनि पुन भने भारतमा लुकेर बस्दै आएको प्रहरीले दाबी गरेको छ। अाज भएको तिवारीको हत्यामा पुनको हात हुन सक्ने प्रहरीले अाशंका गरी प्रहरीले उनको खोजि तिब्र बनाएको छ।
