आफ्ना तीन स्टार स्ट्राइकर लिओनल मेसी, नेइमार र लुइस सुआरेजको अनुपस्थितिमा कोपा डेल रे कपको पहिलो लेगको खेलमा उत्रिएको बार्सिलोनालाई दोस्रो श्रेणीको क्लब हर्कुलसले १–१ गोलको बराबरीमा रोकेको छ।
गत सिजनको विजेता बार्सिलोनालाई स्तब्ध पार्दे डेभिड मेन्जले दोस्रो हाफको ५२ मिनेटमा सुरुवाती गोल गरेका थिए। धन्न युवा खेलाडी कार्लेस एलेनाले ५८ मिनेटमा गोल फर्काउदै बार्सिलोनालाई खेलमा फर्काए।
बार्सिलोनाले आउँदो शनिवार लिगको शीर्षस्थानमा रहेको चिरपरिचित प्रतिद्वन्द्वी रियल म्याड्रिडसँग खेल्दैछ। ‘अल क्लासिको’ भिडन्तका लागि बार्सिलोनाले आफ्ना तीन जनै खेलाडीलाई विश्राम दिएको हो। स्पेनिस ला लिगामा रियल ६ अंकले बार्सिलोनाभन्दा अगाडि छ।
बार्सिलोनाले यही प्रतियोगिताअन्तर्गत नोउ क्याम्पमा हर्कुलससँग तीन सातापछि २१ डिसेम्बरमा खेल्नेछ।
