बार्सिलोनाका लागि एकपछि अर्को विजयी गोल गर्दै आइरहेका अर्जेन्टिनी स्ट्राइकर लिओनल मेसीले क्लब आफूसँग मात्र भर नपरेको बताएका छन्।
एडिडासको ब्रान्ड प्रमोसनमा बिहीबार सहभागी मेसीले भने, ‘बार्सिलोना मेसीसँग मात्र भर परेको भन्ने मलाई लाग्दैन। र, यस विषयमा कुरा गर्नुपर्छ भन्ने पनि मलाई लाग्दैन। किनभने यो कुनै मुद्दा नै होइन।’
मेसीले यस सिजन घरेलु र युरोपेली लिगमा गरी बार्सिलोनाका लागि १८ गोल गरिसकेका छन्। ‘म विश्वको उत्कृष्ट क्लबमा छु, जुन एउटै खेलाडीमा भर पर्देन,’ मेसीले भने।
मेसीले च्याम्पियन्स लिगअन्तर्गत बुधबार समूह ‘सी’तर्फ सेल्टिकविरूद्धको खेलमा दुई गोल गरेका थिए। उनको बार्सिलोनासँगको सम्झौता सन् २०१८ को जुनसम्म छ। नयाँ सम्झौतामाथि नवीकरण नभएका कारण पछिल्लो समय उनले बार्सिलोना छोड्न सक्ने खबर पनि बाहिर आइरहेको छ।
उनले पत्रकारसँग आफ्नो भविष्यको विषयमा कुनै जानकारी दिएनन्। च्याम्पियन्स लिगमा समूह ‘सी’ को विजेताको रुपमा बार्सिलोना अन्तिम १६ मा प्रवेश गरिसकेको छ। तर, स्पेनिस ला लिगामा क्याटलान क्लब रियल म्याड्रिडभन्दा ४ अंकले पछाडि छ। बार्सिलोनाले अघिल्लो खेल रियल सोसिडाडसँग आइतबार खेल्दैछ। २००७ देखि बार्सिलोनाले सोसिडाडलाई हराउन सकेको छैन।
