थिओ वाल्कटले आफ्नो घरेलु इमिरेट्स मैदानमा २६ मिनेटभित्र २ गोल गरेपछि इङ्लिस क्लब आर्सनलले च्याम्पियन्स लिगमा पहिलो जीत दर्ता गराएको छ। वासेलविरूद्ध बुधबार राती सम्पन्न खेलमा वाल्कटले खेल सुरु भएको ७ मिनेटमै घरेलु टोलीलाई अग्रता दिलाएका थिए। उनले एलेक्स सान्चेजको क्रसमा हेडिङ गोल गरेपछि गनर्सले सुरुदेखि नै खेलमा दबाब बनाएको थियो।
अर्को गोल वाल्कटले २६ मिनेटमा थपे। यसै साता आर्सनलले घरेलु मैदानमा चेल्सीलाई पनि ३–० ले पराजित गरेको थियो। यो सिजनको पहिलो खेल लिभरपुलबाट पराजित भएयता आर्सने विङ्गरको यो टिमले ८ खेलको अपराजित यात्रालाई कायम राखेको हो।
पछिल्लो समय सान्चेज, मासुट ओजिल र वाल्कोटलाई आक्रमणको जिम्मेवारी सुम्पिएपछि विङ्गरले यसको राम्रो प्रतिफल पाएका छन्। यी तीन स्ट्राइकरले ५ गोल गरिसकेका छन्। यो खेलको जीतपछि आर्सनल समुह ‘ए’ मा ४ अंकका साथ शीर्षस्थानमा उक्लिएको छ। यही समूहमा फ्रेन्च क्लब पेरिस सेन्ट जर्मनी (पिएसजी)ले ३–१ गोलले बुल्गेरियन क्लब लुडो राजग्राडलाई पराजित गरेको छ।
आर्सनलसँग पहिलो खेल बराबरीमा खेलेको पिएसजीको पनि ४ अंक नै छ।
