विभिन्न घटनामा परि कपिलवस्तुमा दुई जनाको मृत्यु भएको छ।
बिहीबार राती कपिलवस्तुको शिवराज नगरपालिका १ मा बसको ठक्करले एक जनाको मृत्यु भएको छ।
पश्चिमबाट पूर्वतर्फ आउँदै गरेको रा ३ प ९५४५ नम्बरको मोटरसाईकललाई विपरित दिशाबाट आउँदै गरेको लु १ ख ७२८३ नम्बरको बसले ठक्कर दिँदा मोटरसाईकल चालक दाङ लालमटिया बस्ने २६ वर्षीय प्रेम नेपालीको ज्यान गएको प्रहरीले जनाएको छ।
त्यस्तै छिमेकीको कुटाईबाट वाणगंगा नगरपालिका वडा नं. ९ मा बिहीबार राती एकजनाको मृत्यु भएको छ। घरायसी सामान्य विवादपछि स्थानीय तिलकराम थारुले छिमेकी ४४ वर्षीय कन्हैया थारुलाई कोदालो प्रहार गर्दा कन्हैया थारुको मृत्यु भएको प्रहरीले जनाएको छ।
अत्यधिक मदिरा सेवन गरेका तिलकरामले पटकपटक कोदालो प्रहार गर्दा घाईते भएका कन्हैयाको उपचारको क्रममा मृत्यु भएको प्रहरीले जनाएको छ। प्रहरीले कोदालो प्रहार गर्ने तिलकराम थारुलाई पक्राउ गरी ईलाका प्रहरी कार्यालय पिपराको नियन्त्रणमा राखेको प्रहरी उपरीक्षक विष्णु केसीले बताए।
