जाजरकोट सदरमुकाम खलंगामा आइतबार भएको आगलागीमा परी तीजमा माइत आएकी छोरीको जलेर मृत्यु भएको छ।
बसपार्कस्थित एक होटलमा लागेको आगोमा परी अन्य चार जना घाइते भएको जिल्ला प्रहरी कार्यालय जाजरकोटले जनाएको छर।
स्थानीय संगीता होटलमा लागेको आगोमा परी मानसिंह खत्रीकी छोरी संगीताको मृत्यु भएको हो। नायकवाडा २ कि १९ वर्षीया संगीता तीज मनाउन माइत आएकी थिइन्।
आगोमा जलेर मानसिंह खत्रीसहित चार जना घाइते भएका छन्। घाइते हुनेहरूमा भेरीमालिका ४ का १८ वर्षीय गोकर्ण चन्द, कार्कीगाउँ ६ का ४३ वर्षीय मानसिंह खत्री,भेरीमालिका ४ का २३ वर्षीय प्रेम राना र सल्यान डाडागाउँ ६ घर भई प्रहरी चौकी गर्खाकोटमा कार्यरत प्रहरी जवान ३० वर्षीय रमेश चन्द रहेको प्रहरीले जानकारी दिएको छ ।
उनीहरु आगो निभाउने क्रममा घाइते भएका हुन्। घाइते चारैजनाको जाजरकोट अस्पतालमा उपचार भइरहेको छ ।
आगलागीको कारण यकिन हुन नसकेको जाजरकोट प्रहरीले जनाएको छ।
