म्यानचेस्टर सिटीका स्ट्राइकर सर्गियो अगुइरो पिडुँलाको चोटका कारण विश्वकप २०१८ को छनोट चरणअन्तर्गतको खेल गुमाउने भएका छन्।
अर्जेन्टिनी फुटबल संघले चोटका कारण २८ वर्षीय स्ट्राइकर शुक्रबार उरुग्वेविरूद्धको खेलमा अनुपस्थित रहने बताएको छ। उनी सेप्टेम्बर ७ मा भेनेजुएलाविरूद्धको खेलमा पनि अर्जेन्टिनाको टोलीमा देखा पर्ने छैनन्।
अगुइरो आइतबार राती इङ्लिस प्रिमियर लिगअन्तर्गत वेष्ट हामविरूद्ध ३–१ ले विजयी खेलमा घाइते बन्न पुगेका थिए। उनी त्यो खेलमा हामका डिफेन्डर वेष्टन रेडलाई कुहिनाले हिर्काएको आरोपमा केही खेलका लागि प्रतिबन्ध हुन सक्ने पनि बताइएको छ।
विश्वकप छनोटमा अर्जेन्टिना ६ मध्ये तीन खेल जितेर तेस्रो स्थानमा छ।
