यस आर्थिक वर्षका लागि दुई हजार ७ सय ६४ जना निजामती कर्मचारीले सरुवा माग गरेका छन् ।
अन्तरमन्त्रालय र निकाय सरुवाका लागि उनीहरुले सामान्य प्रशासन मन्त्रालयसँग सरुवा माग गरेका हुन् ।
मन्त्रालयका उपसचिव मुकेश किशोरले सरुवाका लागि दुई हजार ७ सय ६४ कर्मचारीले आवेदन दिएको जानकारी दिए । मन्त्रालयले यही साउन ३ गतेदेखि मसान्तसम्म श्रेणीविहीनदेखि राजपत्राङ्कित द्वितीय श्रेणीसम्मका कर्मचारीलाई अन्तरमन्त्रालय र निकाय सरुवाका लागि आवेदन दिन भनेको थियो ।
मन्त्रालयका सहसचिव तथा प्रवक्ता नीता पोखरेल अर्यालले फाराम मङ्गलबारसम्म बुझ्ने काम भएको र अब सरुवाको प्रक्रिया थालिने जानकारी दिईन्।
उनका अनुसार आवेदन दिएका कर्मचारीहरुको भदौ १५ गतेभित्र सरुवा गरिसक्ने मन्त्रालयको तयारी छ ।
सरुवा माग गर्नेमा राजपत्राङ्कित द्वितीय श्रेणी (उपसचिव) का ९३, राजपत्राङ्कित द्वितीय श्रेणी (अधिकृत)का ३ सय १२ जना रहेका कर्मचारी प्रशासन शाखाका शाखा अधिकृत लीलाराज काफ्लेले जानकारी दिए ।
उनका अनुसार नायब सुब्बा एक हजार १ सय ३४, खरिदार ९ सय २ र श्रेणीविहीन ३ सय १० जनाले सरुवाका लागि आवेदन दिएका छन् । यसैगरी प्राविधिकतर्फ पाँचौँ तहका दुई र चौथो तहका ११ जनाले पनि सरुवाका लागि मन्त्रालयमा निवेदन दिएका छन् ।
मन्त्रालयले २४ घन्टा नै कर्मचारीलाई अनलाइनको फाराम भर्ने व्यवस्था मिलाएको थियो ।
अनलाइनमा फाराम भरेपछि एसएमएसमार्फत सरुवाको निवेदन दर्ता भएको र दर्ता नम्बर कर्मचारीले पाउने गरेका थिए । अनलाइनबाट सरुवाको फाराम भरेका कर्मचारीहरुलाई सरुवाको पत्र पनि इमेलमार्फत पठाइने छ ।
उपसचिव मुकेशकुमार केशरीले सरुवाको जानकारी कर्मचारीको इमेलमा पठाउने जानकारी गराए। “सरुवाको पत्र हामीले इमेलमा नै पठाउने गर्छौं”, उनले भने –“सरुवाको पत्र लिन काठमाडौँ आउनुपर्दैन ।”
मन्त्रालयले कर्मचारीलाई सजिलो र सरुवालाई व्यवस्थित बनाउन पहिलो पल्ट अनलाइनबाट फाराम भर्ने व्यवस्था गरेको हो ।
भौतिक निर्माण तथा योजना मन्त्रालयमा ६ ुय ८३, अर्थ मन्त्रालयमा ४ सय ६४, गृहमन्त्रालयमा ३ सय १४, सङ्घीय मामिला तथा स्थानीय विकास मन्त्रालयमा २ सय ५० जना, मन्त्रिपरिषद्मा १ सय १९ जनाले सरुवा माग गरेको शाअ काफ्लेले जानकारी गराए ।
मन्त्रालयले साउन महिनामा मात्र कर्मचारी सरुवाका लागि आवेदन माग गर्ने गरेको छ । देशभर ८३ हजार ५ सय ७० निजामती कर्मचारी कार्यरत छन् । रासस
