प्रधानमन्त्री केपी शर्मा ओलीले बालुवाटार छोडेका छन्। झण्डै साढे ९ महिना सरकारी निवास बालुवाटारमा बसेका ओली बुधबार बिहान पीपलको बिरूवा रोपेर बाहिरिएका उनका प्रेस सल्लाहाकार प्रमोद दाहालले बताए।
२०७२ असोज २४ गते प्रधानमन्त्री भएका ओली त्यसको ५ दिनपछि भक्तपुरको बालकोटबाट बालुवाटार सरेका थिए।
उनी बालुवाटारबाट पहिले नयाँ बानेश्वरस्थित संसद भवन गएका छन्। त्यही नयाँ प्रधानमन्त्रीको निर्वाचनमा भाग लिएर भक्तपुरको बालकोटस्थित आफ्नो निवास जाने छन्।
‘नयाँ निर्वाचित प्रधानमन्त्रीलाई प्रधानमन्त्रीको सरकारी निवासमा सर्न उपयुक्त वातावरण निर्माण होस् भन्ने उद्देश्यले प्रधानमन्त्री आजै आफ्नो निजी निवास बालकोट सर्न लाग्नु भएको हो। नयाँ निर्वाचित प्रधानमन्त्रीको शपथ ग्रहण समारोहमा प्रधानमन्त्री ओली आफ्नो निजी निवासबाटै सहभागी हुनु हुनेछ,’ दाहालद्वारा जारी विज्ञप्तिमा भनिएको छ।
प्रधानमन्त्रीले सुरक्षाकर्मी, सचिवालयका कर्मचारी र सहयोगीहरुसँग छुट्टाछुट्टै भेटेर उनीहरुले पुर्याएको सहयोगका लागि धन्यवाद दिएका छन्।
