रोमानियालाई हराउँदै अल्बानियाले युरो कप फुटबलको अन्तिम १६ मा प्रवेश गर्ने सम्भावना कायमै राखेको छ।
गएराति भएको खेलमा रोमानियालाई १–० ले पराजित गर्दै अल्बानियाले अन्तिम १६ मा प्रवेशको सम्भावनालाई जिवितै राखेको हो। अल्बानियाले प्राप्त गरेको जित ठूला प्रतियोगितामा हात पारेको पहिलो इतिहासिक जित हो।
युरो कप फुटबलमा समावेश गरिएका चार टिम मध्ये अल्बानिया एक नयाँ टिम हो। अल्बानिया रहेको समूह ‘ए’बाट फ्रान्स र स्वीट्जरल्याण्ड समूह विजेता र उपविजेता बन्दै अन्तिम १६ मा प्रवेश गरिसकेका छन्। अल्बानिया समूह ‘ए’ तेस्रो स्थानमा छ।
युरोकप फुटबलमा सहभागी सबै राष्ट्रमध्ये समूह चरणमा उत्कृष्ट प्रदर्शन गर्ने चार टिममा परेर अन्तिम १६ मा प्रवेश गर्ने सम्भावना अल्बानियाको कायमै छ।
अल्बानियाका लागि अर्मान्डो साडिकुले खेलको ४३ औं मिनेटमा गरेको गोल नै निर्णायक बन्यो। अल्बानियाले भने तीन खेलमा एकमा जित र दुईमा हार ब्यहोर्दै ३ अंक जोडेको छ।
तीन खेलमा दुईमा हार र एकमा बराबरी नजिता निकालेको रोमानियका भने समूह चरणबाटै बाहिरिएको छ।
