नेपाल पर्यटन बोर्डले मासिक रुपमा आयोजना गरिरहेको ह्यास ट्याग फोटोनेपाल प्रदर्शनी अन्तर्गत जुन महिनामा हुने प्रदर्शनीमा वातावरण र जलबायु परिवर्तनसँग सम्बन्धित तस्बिरहरू प्रदर्शनी हुने भएको छ।
प्रत्येक अंग्रेजी महिनाको पहिलो शुक्रबारदेखि आइतबारसम्म आयोजना हुने यस प्रदर्शनी यसपटक जेष्ठ २१–२३ मा हुँदैछ। जुन ५ विश्व वातावरण दिवस पनि परेकाले यसपालि वातावरणसँग सम्बन्धित फोटोहरू छानिएको हो।
फोटो सर्कलसँगको सहकार्यमा हुने यस प्रदर्शनी जेष्ठ ९-१९ राजधानीका विभिन्न कलेजहरुमा गरिसकिएको छ। उक्त स्थानहरुमा पोष्टकार्ड मार्फत घुमफिर वर्ष २०७३ को पनि प्रचार प्रसार गरिएको थियो। किशोर शर्मा र नरेन्द्र मैनालीद्वारा धनकुटा, सिन्धुपाल्चोक र रसुवामा खिचिएको फोटोहरु प्रदर्शनीमा हुनेछन्।
जुन ५ मा भोजराज भाटद्वारा निर्देशित देश तथा विदेशमा पुरस्कृत फिल्म सुनकलीको प्रदर्शनी तथा निर्देशकसँगको अन्तरक्रिया कार्यक्रम पनि राखिएको छ।
